Sontga Mengia, vieua.

pdf: cheu l’entira historia
Ils 4 da matg: Sontga Mengia, vieua

Sontga Mengia ei naschida igl onn 332 a Tagaste en Algeria. Ses cartents geniturs vevan dau ad ella ina buna educaziun. Mengia fageva bugen oraziun e veva gronda cumpassiun culs paupers. Siu desideri fuva da viver en purschaladi e da buca semaridar. Mo per obedir a ses geniturs, eis ella tuttina sespusada cul reh giuven Patrizius. Quei fuva in pagaun e Mengia ha spusau el buca da libra voluntad, mobein cun la speronza da puder trer el sin la dretga via. Dasperas era Patrizius in um criu che sevilava e bueva, aschia che sontga Mengia veva bia da pitir e suffrir per volver el sin la buna vart. Sin la damonda d‘autras dunnas, co ella sappi viver cun in um aschi criu e ruh, ha ella rispundiu: Per stinschentar il fiug dalla gretta ei negin auter mettel megliers che da quescher e ver ina dultscha pazienzia. Mo aschia po ina dunna quietar e dumignar la rabiata e furiusa natira d’in um. Quei che sontga Mengia cussegliava allas autras dunnas, teneva ella sezza cun tut adatg. Aschia ha ella finalmein urbiu ora da Diu che siu Patrizius ei daventaus in bien cartent catolic. Sontga Mengia ha giu treis affons: dus fegls ed ina feglia. Il fegl vegl ei stau sogn Augustin, il grond doctur e petga dalla sontga Baselgia. Da giuven fuva Augustin, vivs e sfarfatgs, che leva buca tedlar e suandar ils buns cussegls da sia mumma.
Pervia da quei spundeva ella bia larmas, mo schava mai sut d’urar per siu sfarfatg fegl. Augustin aunc buca battegiaus, va a Ruma per studegiar. Leu vegn el grevamein malsauns. Mo entras las larmas e l‘oraziun da sia mumma vegn el puspei sauns, sco el sez ha dau perdetga. Da Ruma va Augustin pli tard a Milaun senza dar part a sia mumma. Per encurir sia nuorsa piarsa, banduna ella sia patria, traversescha la mar ed arriva lu in di a Milaun. Leu anfla ella ussa siu fegl tut semidaus. Quei fuva daventau cun seconversar cun sogn Ambrosi, uestg da Milaun. Sontga Mengia fuva tut consolada ch’ella veva cun agid da sogn Ambrosi saviu menar il fegl Augustin tier la cardientscha catolica. Cun 34 onns ha Augustin retschiert il sogn Batten e silsuenter daventaus in grond sogn e defensur dalla sontga cardientscha catolica. Mengia engrazia a Diu per la misericordia fatga cun siu affon e cun fatschas ventireivlas ein mumma e fegl parti da Milaun per turnar en lur patria. Ad Ostia ch’ei circa quater uras naven da Ruma, han els ruassau e spitgau sin ina buna caschun da s‘embarcar. Ella ei vegnida malsauna e savend che sia veta mondi ussa alla fin, ha ella detg: Satrei miu tgierp cheu e fagei buca fastedis pervia dad el. La suletta caussa che jeu damondel ei, da seregurdar da mei duront mintga sontga messa. Suenter nov dis da malsogna ei quella benedida olma, pleina da sontgadad, spartgida dil tgierp ils 4 da matg digl onn 387 en siu 56 avel onn. Ella ei vegnida satrada en la baselgia da sontga Onna e pli tard translocada a Ruma en la baselgia da sogn Augustin che fuva suenter daventaus …